好想趁自己仲記憶猶新，記錄低呢件人生大事。
11月29日預產期，因為今年仲有好多Annual Leaves要清，所以11月2日我開始放假了。
放假頭10日左右都忙得幾開心的，日日洗BB衫洗被鋪、整炒米茶、準備產後調理補品、玩fitball做產前運動、執走佬袋、落街散步、煲湯煮飯等，都好耐未試過D咁悠閒既生活。
但之後開始覺得悶了，又驚隨時作動，唔敢離開屋企附近，無得去街玩，就成日對住自己個肚問：「BB你想幾時出黎呀？媽咪ready架喇。」
一日一日咁等，都毫無動靜......我悶到拎個走佬袋出黎fine-tune左接近20次，老公仲問我：「成日話finalize個走佬袋，究竟幾時先finalize到?!」
11月26日，距離預產期只有3日，我開始有少少流啡了。少量流啡持續左兩日，但又未見紅未穿水未有陣痛，我繼續靜觀其變。
11月27日，老公公司夜晚Annual Dinner，O係博覽館好遠。我由前兩日開始就對住個肚講左好多次：「BB你唔好咁快出黎住呀，等埋Daddy Annual Dinner完左返黎先呀！媽咪自己一個入院好驚架！」
結果果晚12點左右，老公一返到屋企，我就見紅了。好神奇！BB好似聽得明咁。
隨即有輕微不規則的陣痛，我見陣痛只係好輕微，就唔入院住，拿拿臨同老公訓返陣覺先。
直至零晨4點幾，陣痛愈來愈密，大概10分鐘左右痛一次，而且開始感覺到真係痛，於是叫醒老公話不如入院啦。
我地起身刷牙洗臉食個早餐，老公驚我無力生，帶定兩隻蕉，拎埋個走佬袋，我地零晨5點幾坐的士出發去威爾斯醫院。
去到醫院產前病房，見到一排爸爸好眼訓咁坐曬O係病房出面等，我同老公講，一陣你唔洗怕悶，可以搵佢地吹水。
姑娘叫我老公去幫我辦入院手續，然後我就見姑娘做檢查。檢查完之後，就比套粉紅色睡衣我換，然後去搏機check BB心跳和陣痛。
完成之後安排左產前病房一個床位比我，但就吩咐我唔好攤晒D行李出黎，因為可能一陣要轉去候產室，咁我就淨係拎左對拖鞋和保溫杯出黎。
呢個時候因為未到中午探病時間，老公一直要坐出面等。
朝早8點左右開始派早餐，分左兩碗瘦肉粥比我，我驚自己無力生，將兩碗粥食晒。
醫生大約9點過黎幫我檢查，點知佢一黎，我就O係佢面前穿羊水，感覺到一陣暖流由下面湧出黎。醫生話我穿左羊水要24小時之內生，否則就要開刀，所以會睇情況一陣可能會幫我落催生藥。我聽到都想佢拿拿臨幫我落藥，因為我唔想再等，又好驚24小時自己生唔出要開刀。不過醫生話有D人對催生藥唔起作用，都有機會要開刀的。好驚驚...真係博一博...
我D朋友仲whatsapp話穿水之後好快生，估我朝早10點幾應該生左。
一直等到10點左右，都未有人黎同我落催生藥，我就問姑娘要等到幾時，姑娘話候產室未有位，要排隊...... 下?! 原來要排隊的..... 又開始擔心自己24小時之內生唔切......
而且好神奇地，自穿左羊水之後，陣痛比之前疏左又輕微左，大約20-30分鐘先痛一次。心諗真係死，咁落去點生得出...
好悶，自己行左出去走廊搵老公傾下計。其間有張病床被飛快推過走廊落產房，床上個媽媽捲縮住，全身震晒，一邊喊一邊叫，個姑娘叫個媽媽：「兩隻腳夾實！忍住！忍住！」場面好恐怖，我驚到心都離一離......
等到中午12點，終於到探病時間，老公可以入病房陪我。隔左一陣，好快有個姑娘過黎通知我候產室有位，宜家可以過去落催生藥，問我要唔要呢個位。我當然即刻話要啦，但要即刻過去，趕唔切食中午飯，於是攞今朝兩隻蕉出黎隊入個口度，然後去厠所換網褲，換換下個姑娘仲入黎厠所催我快D，心諗無啦啦又咁鬼快，追死人......
換完褲一出去就拎個走佬袋交比姑娘鎖locker。姑娘話我應該幾個鐘頭內都未生得，於是我叫老公返屋企休息下先，順便幫我拎個手提電話返去叉電，一陣下午5點半探病時間先再黎。
我跟姑娘過去對面候產室，呢度比產前病房乾淨俐落，不過每個床位都拉上布簾，又傳出唔同媽媽的慘叫聲，感覺好恐怖......
我問姑娘拎杯水，但原來佢話過左黎候產室就唔可以再飲水，下...死啦！早知頭先飲完先過黎！我話我真係好口渴，姑娘話咁我偷偷地拎一杯比你啦，點知佢拎左一杯勁細的，一啖就飲完 --!
安排左一個床位比我之後，就幫我搏機check BB心跳和陣痛，又幫我檢查度數，但話我一度都未開，真係灰......
下午1點左右，有醫生過黎，好後生的男醫生，唔知係咪實習，話會幫我人工穿水，因為我今朝的自然穿水未穿晒，穿晒水之後陣痛有機會密D可以快D生。
醫生用手指伸入去篤，伸到好入篤來篤去都篤唔到，乜料...我話好痛......之後有另一個助產士過來再篤，篤左一陣終於篤穿左，立即有一陣暖流湧出。
個助產士同我講，打後幾個鐘頭都會有羊水不停流出，佢地會觀察一陣先幫我落催生藥。
下午2點，我依然係一度都未開，陣痛又唔夠密，於是姑娘幫我落催生藥，係吊針插手背的。
下午2點半，我似乎對D藥有反應，陣痛開始黎料，不過都仲可以接受。用之前上堂學過的呼吸法忍耐住先，唔想咁快要求聞笑氣，驚遲D再痛既時候無其他方法止痛。
自己用意志力忍痛，一呼一吸的忍到3點左右，愈來愈痛了，我叫姑娘過黎幫我set笑氣比我聞，吸完個人係會有少少wing wing地。
下午3點半，似乎我真係好受催生藥，陣痛開始劇變了，已經變到每2-3分鐘痛一次，每次痛1分鐘，笑氣變得完全無效，吸完個人又一D都唔Wing，我叫姑娘過黎check下桶笑氣入面係咪無晒氣，姑娘又話有好多，叫我繼續吸......吸鬼吸馬，我試過吸同唔吸，痛既感覺係一模一樣，不過吸左心理上感覺好似好D，自欺欺人咁。
真係好痛，痛到典來典去，個口開始發出ee hm hm咁，下面又不斷流溫暖的血水、羊水，成個pat pat和背脊都濕晒。我嘗試幻想自己O係馬爾代夫的SPA，暖洋洋好舒服，想令自己好過D，但其實仲係好Q痛！
我又再叫姑娘過黎幫我檢查下我宜家開到幾多度，姑娘check左話我只開左兩度，聽到真係灰爆！咁死痛究竟要持續幾耐......
下午4點半，成個肚都絞住劇痛，我開始變得唔理智，呼吸法都唔係每次陣痛時做到，唯有雙手抓實欄杆......我再叫姑娘幫我睇下個笑氣桶入面係咪無晒笑氣，姑娘又話有，救命！我話點解我一D Wing既感覺都無，姑娘話人人受藥反應唔同，我話我就快頂唔住啦......><
下午5點，痛到飛起，感覺似10級M痛+10級急屎痛，因為度數未開夠，感覺似10級急屎但又要忍實唔比你痾咁，每一下劇烈陣痛之後都有餘震，全身抖震！我叫姑娘過黎幫我睇下開到幾多度，但佢話我應該仲有排，所以唔幫我檢查，等6點鐘醫生過黎時先幫我檢查。我再厚顏無恥咁叫佢幫我check下桶笑氣究竟有無氣！姑娘又話有...點解一D止痛功效都無？！呢刻我真係好想死，好後悔無揀私家開刀！
附近床位的媽媽個個慘叫得好恐怖，我唔敢叫，因為怕蝕左道氣一陣生唔出，所以好努力咁死忍。
我已經痛到唔知自己可以點，雙手抓緊床兩邊的欄杆，每一下陣痛黎既時候我都深呼吸一大啖、痛到側埋一邊、雙腳夾實、頭狂仰後，好似屍變咁。
應該就快到探病時間，好想快D見到老公，等心靈上有D安慰，但同時又唔想比佢見到我宜家呢個咁核突既屍變衰樣，我諗我老公從來都未見過我咁核突，真係好傷心.......
下午5點半，終於到探病時間，老公黎左，佢坐O係我側邊，我苟延殘喘咁同佢講：「我.....好痛...好痛......你...千祈....唔好掂我.....」我真係痛到癲左，痛到唔可以比任何人掂我身體任何一個部分。
姑娘過黎幫我check胎心機，我無晒力咁同佢講：「可...唔可以...幫我...check下...我...宜家...開左...幾多度？我...真係...好痛.......我頂唔...住啦...」然後我真係痛到忍唔住喊左出黎。姑娘話6點醫生會過黎幫我check，叫我忍多陣，又話生BB係咁痛架喇。
下午6點，醫生黎左幫我check度數，check左話我只係開左3-4度.......點解呀？！我已經10級陣痛，但只係開左3-4度？！仲要捱幾耐？我好想好想死......極度後悔無揀私家開刀！我究竟可以點捱落去？！
我繼續屍變，痛到講唔到野，老公只係默默坐O係身邊支持我。我強忍淚水叫自己唔好喊，我已經係媽媽，做媽媽要強大，唔可以再喊。
痛到全身發抖，感覺似承受十大酷刑，一分一秒都好難過，最慘係唔知仲要痛幾耐。大約晚上7點半，我叫姑娘幫我檢查度數，姑娘話我應該仲有排未得，所以無幫我check，話要等夜晚9點醫生過黎時先等醫生check。我好灰，但都無力再同姑娘講啦，叫老公去醫院canteen食D野先，有排都未到9點。
老公去左Canteen無幾耐，醫生提早左8點鐘就黎到，佢幫我檢查度數，一伸入去摸就笑笑口咁話：「呢個得啦喎，8度啦，可以準備落產房。」我聽到猶如人生重獲希望咁！勁開心！好緊張咁同姑娘講，快D叫我老公返黎！
姑娘比左醫院個電話我打，我以為係佢地會打比我老公，原來係要自己打。我已經痛到唔係好睇得清電話上D numbers，打左第三次先打得岩，電話一接通就同老公講：「我....8度...啦，宜...家....落...產房，你...快D...返黎...」老公好冷靜咁話：「我即刻返黎！」
打完電話之後，產房D人搬左張床O係我訓緊果張床隔離，叫我自己連埋張床墊移動過床，痛到就快死咁，呢個真係高難度。不過開到8度既我重獲希望，用盡氣力自己過床！過床之後唔知點解仲唔推我落去，等左好鬼耐，原來產房未有位，我又要忍痛再等。
等左20分鐘左右，終於推我落去，一出候產室，就見到我老公O係出面等緊，我好開心；又有好多人望住我，感覺好似拍戲咁。
落到產房，經過條走廊仲恐怖，聽到好多慘叫聲。
佢地推左我入一間產房之後，又叫我過床。頂！點解唔可以O係同一張床度生呀？！鬼死咁痛成日叫人過床好痴線！
好啦，我用盡全身既氣力，拎住張床墊移動自己個BODY (同埋我唔明點解成日叫我拎埋果張床墊，鬼死咁污糟都唔幫我換張新既)，移到一半，陣痛又黎，我痛到完全郁唔到，上半身O係另一張床，下半身O係原先張床，卡住O係中間郁唔到，D姑娘個個好緊張咁話好危險叫我快D移過去，頂你個肺，我好X痛郁唔到仲催我！我話我好痛，你等一兩分鐘先。等陣痛停左，我即刻移埋下半身過去。
過左床之後就叫左我老公入黎陪產。D姑娘慢吞吞咁執野準備，話我只係8度未生得。我同助產士講，我話一陣如果有需要剪我會陰你就剪，千祈唔好話比我知。
好多個鐘頭無飲過水，我口渴到爆，咀唇都乾晒，姑娘只係用濕紙巾幫我濕下個口，依然無水飲。
我問姑娘仲要等幾耐，佢話通常一個鐘頭開一度，大約等多兩個鐘左右。我立即灰爆，仲要等多兩個鐘？！我猶如十級急屎痛爆，點忍落去？！好想即刻痾出黎！
等等下，我感覺BB好似出緊黎咁，就同姑娘講，我feel到頭仔好似出緊黎。跟住D姑娘同助產士幾個人一齊觀賞我下面話：「係喎係喎，真係有D影喎，準備生得！」哇！我又重獲希望！！
呢一刻我又好緊張咁同助產士講多一次，驚佢唔記得，叫佢要剪會陰就剪，千祈唔好話比我知。
助產士幫我準備好坐姿後，就叫我等陣痛一黎時大力好似痾屎咁痾出黎。好，我一痛就立即用盡全身氣力咁痾左第一下，但助產士話我用錯力，唔應該嗌出黎因為會蝕左道氣。我叫佢講解一次之後，我等陣痛一黎就用盡全力，長長一道氣咁push，助產士話我做得好好，已經痾左個頭仔出黎。等下一次陣痛，我再用盡全力push，但突然中途佢地叫我唔好痾，要停，呼氣呼氣。喂頂！之前又唔比D心理準備我叫我一陣有可能痾痾下要停，一道氣咁出要突然剎制好辛苦！我估應該係BB膊頭唔夠位出，唔可以格硬痾，佢地要剪我會陰，但我個肚至下體全部已經痛到爆，都無感覺唔知佢究竟有無剪。之後陣痛又黎，佢地叫我可以push喇，我就立即用盡全力一道氣咁push，佢地好開心大叫話我好叻，又好似拎走左D野咁，不過我下面真係痛到無乜知覺，迷迷糊糊唔係太肯定自己係咪已經生左，就大叫：「BB係咪已經出左世喇？」我老公話：「係呀係呀！好多頭髮呀！」聽到BB喊聲之後我心情好激動又好感動，立即爆喊左出黎。老公鍚我一啖，話我痾左三下就生左好叻。XD
11月28日，個囡比預產期前一日出世。由尋晚12點至今晚9點，作動21小時，就係咁，一夜之間我做左人地媽咪。
姑娘抹乾淨BB之後就抱過黎放O係我心口前。BB好細小，我攬住佢同佢講野，佢就停左喊，望下我，好似認得我把聲咁。生命真係好奇妙，第一次照超聲波時，BB連1cm都無，宜家就成個人訓左O係我心口上面，成為左我同我老公的下一代。
我攬住BB真係開心到形容唔到，助產士走左，要等醫生黎同我聯針，我就一直摸下BB同佢傾計。
醫生之後入左黎，我一望，死！呢個咪就係今日下午幫我篤穿唔到羊水果個後生醫生？！又係你？！勁驚傷口比佢聯得唔好。
醫生有幫我打麻醉針，但唔知係咪有D位無乜藥力，聯針時都好鬼痛，佢仲要反來反去唔知點咁，痛死人！不過相比起頭先的陣痛，呢一刻已經好好多，經過生B一事之後其他痛楚都好似變得小兒科了 :P
聯針聯左大約30分鐘，大約夜晚12點，我同BB分別都被人推上產後病房。安排左我去一個床位之後，老公入黎幫我執拾好行李，買左兩個麵包比我食，就返屋企休息了。
咁多個鐘頭無食野無飲水，我超肚餓，即刻隊個麵包隊杯水。
BB沖完涼之後姑娘就推返佢入黎我身邊，姑娘問我打算餵母乳定奶粉，我話母乳，佢就教我點埋身親餵，於是我同BB渡過左第一次的親密時光 (sweet ^^)。
威爾斯醫院實施母嬰同室，開心可以隨時見到BB，不過全層病房的BB都O係度輪住大喊，環迥立體聲咁，根本成晚我都訓唔到覺。
生完6個鐘頭後，姑娘過黎同我練習落床，我自己行到之後佢就話宜家開始我要自己照顧返BB了。生完之後先覺得其實順產都幾好，生完6個鐘就立即自己落到床活動自如，傷口都唔太痛。
我覺得威爾斯都幾嚴厲，一選擇左餵母乳之後就唔會比奶粉你餵BB，逼你多埋身。BB床頭有個表，每次親餵完就要剔一剔，兩至三個鐘頭親餵一次，成日有姑娘黎巡房檢查我地個表，感覺有D似女子監獄咁，邊個無剔無親餵就會比姑娘好嚴厲咁話你。
但我覺得自己未上奶，成日抱住BB比佢啜但又啜唔到，好似好無聊咁，我BB又極度懶訓，拍極搖極都唔醒，勁難餵佢。我同姑娘講我BB點都唔醒，姑娘話等我黎示範比你睇，點知連姑娘都攪佢唔掂，然後又叫我繼續試下，就走鬼左去第二張床無再理我。我見點都整佢唔醒，是但比BB個咀舔左幾下，就剔左個表算鬼數 :p
到第二日，姑娘話BB已經小便，有一條濕片，即係佢已經飲到人奶。我覺得好神奇，原來佢真係食到奶，突然我充滿幹勁咁比BB密密啜。然後到第二日，BB已有三塊濕片了，真係好開心。
住左醫院兩晚，我真係好累，因為好多BB輪流喊，根本訓唔到覺，連續三日總共都唔知有無訓到6個鐘，好想快D出院返屋企訓。
忽然姑娘同我講，我同BB健康狀況良好，可以出院了。等都唔等，立即叫老公帶出院衫褲來比我同BB，就告別住左三日兩夜的威爾斯了。
留言列表
